ஒரு யுகமாகுமே என்ன செய்ய! 😔




வார இறுதி நாட்களில் 
உன் நினைவைத் தாங்கி 
சில மணிநேரம் 
தனித்திருக்கிறேன்
இதர நாட்களில் 
சில நிமிடங்கள்

பெருகும் கண்ணீரை 
கனக்கும் இதயத்தை 
என்ன சொல்லி 
தேற்றுவதெனத் 
தெரியவில்லை

இதயத்திற்கு 
இத்தனையருகில் - ஒரு
இழப்பை 
துயரத்தினை
வலியை 
நான் சந்தித்ததேயில்லை

நிறைய
நல் நினைவுகளை 
தந்த நீ
இதையும் தந்து 
போயிருக்கிறாய்

உனது அருகாமை
இதயத்தினை
இலேசாக்கும் எப்போதும்
முதன் முறை
உனது இல்லாமை
கணமாக்கியிருக்கிறது

ஒளிரும் 
உனது கண்களை 
நெருப்புக்கு 
தின்னக் கொடுத்துவிட்டு 
இருளில் 
அலைகிற, அழுகிற 
சாபம் எனக்கு 

உனக்கென்ன
ஒரே தினத்தில்
கடந்து போய்விட்டாய்
எனக்கு 
ஒரு யுகமாகுமே
என்ன செய்ய! 😔

Comments

  1. AnonymousSaturday, January 20, 2024 1:05:00 pm

    நீ படும் வேதனை தான் எனக்கும்
    இளைய பருவம் நண்பனின் நட்பில் அழகானது. கல்லூரி வாழ்க்கை அதை விட அழகாக்கியது உனது நட்பு. கல்வியில் சிறந்த உன்னை எந்நாளும் ஒரு குருவாகவே நினைத்தேன். கெமிட்ஸ்ட்ரி லேப்பில் டைட்ரேஷன் செய்கையில் பொட்டாசியம் பெர்மாங்கனேட் சோதனையில் கூட உன்னிடம் கேட்டுத் கேட்டு செய்வேனே. மாலை நேரம் கல்லூரி முடிந்து வீட்டிற்கு மிதிவண்டியில் செல்லும்போது பல கதைகள் பேசி சிலாகிப்போமே. அந்நாள் இனி வாராதா

    ReplyDelete

Post a Comment

Popular posts from this blog

அவள் பாதங்கள்

Image
அவள் கால்விரல்கள் குறித்த கனவொன்று கால்பதித்திருந்தது கரிய இரவின் கலைந்த நினைவில் சற்றே நீண்ட பாதங்கள் இரெண்டும் அவளது அழகு நிலையங்களில் அடிக்கடி அழகுபடுத்திக் கொள்வாலென நினைக்கிறேன் அவசியமின்றி பெருவிரல்கள் இரெண்டும் நீண்டு தலைவன் போலும் ஏனைய விரல்கள் எட்டும் ஏவகம் பணியும் சேவகர்கள் போலும் அத்தனை ஒருங்கமைப்பாய் அழகுமிளிர அமைந்திருக்கும் பாதங்கள் அவளது சதைமீறி நீண்ட சிறு நேர்த்தி நகங்களில் அவள் புனையும் அழகு நிறங்கள் அத்தனையும் அழகு அவள் முகம்தவிர்த்து பலமுறை பாதங்களில் நெடுநேரம், குறுந்தூரம் பயணித்திருக்கிறேன் கண்கள் வாகனமாய் கவ்விக்கொண்டு குதிங்கால் உயர பாதுகைகள் அணிந்து அவள் நடக்கையில் பயந்திருக்கிறேன் பரிதவித்திருக்கிறேன் பாதங்கள் நோகுமேயென்று சிலகவிதைகள் அவள் பாதங்களில் பிறந்து என் வரிகளில் வளர்ந்திருக்கின்றன எத்தனையிருந்தும் அவள் பாதங்கள் தடவி விரல்கள் சொடுக்கி நனவில் விழையாது கரைந்து போன கனவு காதல் பாதங்களவை.
Read more

காக்கா கவிதை

Image
காக்கா கவிதை :- புத்தகத்தில் எல்லாம் புதைந்திருக்க கைகள் மட்டும் காகங்களுக்கு உணவிட்டுக் கொண்டிருந்தன வந்தமுதல் காகம் வயிறு நிரம்ப உண்டபின் வாய்கூவி அழைக்க வந்துண்டன ஏனைய காகங்கள் நம்போலன்றி! சில புறாக்களும் சிறிது நேரத்தில் வந்தன புறாக்கள், காகங்கள் போல் கண்டதையும் உண்பதில்லையென கவனித்ததில் தெரிந்துகொண்டேன் ரசனைவாதிகள் என்போன்று! காகங்கள் சண்டையிட புறாக்கள் பயந்தோடின நான் அசையவேயில்லை சிறுவனாயிருந்தும்! புறாக்களின் உடலமைப்பும் செயல்பாடுகளும் அழகானவை காகங்கள் போலன்றி குரங்கிலிருந்து வந்த நமக்கு காகங்கள் தான் மூதாதையர்கள் கடுகளவும் சந்தேகமேயில்லை!  
Read more